Eth Musèu dera Val d’Aran hestege eth Dia Internacionau des Musèus
Coma cada an, eth hilat de Musèus dera Val d’Aran s’a hijut ara iniciativa der ICOM (International Council of Museums), institucion que de 1977 ençà organize eth Dia Internacionau des Musèus e promò qu’es musèus organizen activitats ath torn deth 18 de mai (Dia internacionau). Enguan, eth lèma prepausat entara comunitat museïstica internacionau per ICOM ei “Musèus entara educacion e era investigacion”. A compdar d’aguesta prepausa, eth Musèu dera Val d’Aran harà a conéisher ua part des recèrques que se hèn en musèu a trauès de dues activitats didactiques. Aguestes activitats tractaràn es dues tematiques annaus principaus: er an dera tèrra e eth 40au aniversari deth Musèu dera Val d’Aran.
Era tèrra serà era protagonista dera activitat “Eth brotoar dera tèrra”, que s’amiarà a tèrme ena Mòla de Salardú, entà explicar, de manèra dinamica e participativa, eth coltiu deth cereau en Aran e era sua transformacion en haria enes mòles. Aguesta activitat aurà lòc es dies 16 e 18 entàs 11:00 ores. Era particularitat dera session de dijaus 16 se base ena participacion des membres dera Associacion de Discapacitats d’Aran (ADDA), en tot cercar era sua interaccion damb eth public generau.
Eth dissabte 18 de mai, entàs 19 ores, se poderà visitar eth Musèu dera Val d’Aran a trauès dera activitat “10 peades pera nòsta tèrra”. Aguest itinerari permeterà hèr a conéisher 10 hèts amagadi darrèr des 40 ans d’istòria deth Musèu dera Val d’Aran. Entà acabar, era Net des Musèus se hestejarà damb era dubertura de pòrtes deth Musèu dera Val d’Aran enquiàs 23:00 ores.
Es activitats son gratuïtes e sense resèrva, pr’amor qu’es pòrtes son e seràn dubertes entà toti es publics.
Es musèus se poderàn visitar gratuïtament es dies 18 e 19 de mai.