Aran acuelh era prumèra pròva pilòt en sud d’Euròpa damb un ictiocida biodegradable tara eliminacion de peishi invasors

Eth projècte LIFE RESQUE ALPYR, inície ua pròva pilòt pionèra d’eliminacion de peishi invasors damb un biocida biodegradable en un estanh de nauta montanha en circ de Colomèrs, ena Val d’Aran. Aguesta iniciativa ei part d’ua estratègia mès longa tà restaurar abitats aquatics de nauta montanha, entà convertir es estanhs restaurats en resèrves de biodiversitat e de corredors ecologics. Se tracte dera prumèra aplicacion en un estanh de nauta montanha en sud d’Euròpa, que proporcionarà dades importantes sus era sua eficàcia coma esturment de gestion.

Ua des principaus menaces tad aguesti espacis ei era preséncia d’espècies de peishi introdusits, com era pesquida, qu’acaben damb es espècies autoctònes e altèren grèument er equilibri des ecosistèmes. Per aquerò, ua des accions claus deth projècte ei era restauracion de 22 estanhs de nauta montanha des Pirenèus e des Aups mejançant era eliminacion de peishi introdusits damb tecniques tradicionaus.

Rotenona: ua solucion innovadora

Es tecniques convencionaus de captura, coma hilats, params e pesca electrica, son abituaus ena eliminacion de peishi en estanhs de montanha. Totun, es restriccions biologiques e ambientaus, coma era dimension der estanh o era preséncia dera pesquida, pòden limitar era sua aplicabilitat. Per aguest motiu cau explorar metòdes alternatius.

Era pesquida, un petit ciprinid de rapid creishement, nauta taxa reproductora e grana capacitat d’adaptacion, pòt formar populacions denses e convertir-se en un rèpte tath contraròtle demografic dera espècia.

En aguest contèxte, s’a hèt una pròva pilòt damb rotenona, un ictiocida naturau biodegradable extrèt des arraïtzes de plantes dera familha des Fabaceae, que s’a utilizat tradicionaument en sud-èst asiatic e en America deth Sud entà pescar. Se i hig un producte semblant ara tròca o Verbascum, ua planta que s’a utilizat istoricament enes Pirenèus tà pescar enes tolhes des arrius.

Aplicacion pionèra enes estanhs de nauta montanha des Pirenèus

Era pròva pilòt s’a hèt en un estanh dera zòna periferica deth Parc Nacionau d’Aigüestòrtes e Estanh de Sant Maurici (PNAESM), laguens dera Val d’Aran, situat en ua localizacion estrategica, a on non i a estanhs alimentadi de grani corsi d’aigua que poirien representar un risc de reaparicion de peishi invasors un còp acabada era intervencion.

Life Resque Alpyr ei un projècte LIFE que promò accions entara recuperacion d’abitats dera flòra e fauna de nauta montanha a trauès dera conservacion de diuèrsi abitats e espècies laguens d’airaus protegits deth hilat europèu Natura 2000 des regions biogeografiques aupines deth Pirenèu e des Aups (liferesquealpyr.eu).

Ei un projècte cofinançat peth programa LIFE 2020 dera Union Europèa coordinat peth CEAB-CSIC, a on i pren part eth govèrn aranés a trauès der airau de Miei Naturau, era Generalitat de Catalonha, era Universitat de Barcelona, er IDAEA, e d’autes institucions e empreses privades.