Naut Aran seguís damb eth sòn cicle d’accion sociau dedicat as familhes e adolescents
Dempús dera excellenta acuelhuda qu’auec era prumèra jornada deth cicle d’accion sociau der Ajuntament de Naut Aran ena Sala Culturau de Salardú damb ua conferéncia de Fran Rojas nomentada “Entendre l’adolescència per saber com educar” e damb era collaboracion d’Amentaran, ara arribe ua dusau session laguens d’aguest cicle a cargue de Marc Masip damb ua doble conferéncia. Serà deman dimars dia 14 de mai entàs 17:00 e es 19:00 dera tarde ena Sala Polivalenta de Salardú.
Era prumèra, qu’ei dirigida entàs adolescents, se nomente “Ac vòs provar tot” e tracte sus eth consum de substàncies e a coma objectiu informar as joeni sus aguesta qüestion damb es principaus perjudicis que represente. Ath delà, e enfocat entàs familhes, s’harà ua conferéncia sus era adiccion as naues tecnologies damb eth nòm de “Era eroïna deth sègle XX”. Aguesta accion s’aufrís de forma gratuïta per Ajuntament de Naut Aran damb eth prètzhèt d’informar a toti dus collectius sus es risqui que i existissen actuauments ena societat.
Era tinent d’alcalde e còsso d’accion sociau deth consistòri, Anna Geli, destaque que “aguest cicle d’accion sociau respon a ua demana des pairs e mairs deth municipi pr’amor qu’an fòrça preocupacions damb es ahèrs vinculadi ara joenessa e a quedat demostrat damb era prumèra conferéncia qu’aguesti collòquis son tot un succès e an un motiu tà hèr-se. Aguest ajuntament tostemp apostarà per potenciar es ahèrs sociaus en municipi.”
Aguest cicle finalizarà eth pròplèu 23 de mai damb un talhèr d’educacion sexuau tàs familhes ena Sala Polivalenta de Salardú a cargue de Silvia Catalán.