Un an mès torne era dança e musica tradicionau aranesa entà aumplir era sason d’estiu damb interpretacions que son ua mòstra deth folclòre e cultura deth territòri aranés.
Pendent eth mes d’agost, der 11 e enquiath 24, Es Corbilhuèrs de Les, era Còlha Santa Maria de Mijaran, Es Sautarèths de Bossòst e Es Fradins de Vielha, interpretaràn eth sòn repertòri de dances ath long dera Val d’Aran.
Ena programacion d’enguan, Es Sautarèths de Bossòst dauriràn eth programa en Vilac eth dia 11, tàs 19.30 ores, Es Fradins de Vielha dançaràn eth 15 d’agost en Arties, tàs 19.30 ores, era Còlha de Santa Maria de Mijaran serà eth 21 d’agost en Les, tàs 19.00 ores, e Es Corbilhuèrs de Les dançaràn en Vielha eth 24 d’aguest mes, tàs 20.15 ores.
Damb aguesta naua edicion se vò apropar as visitaires es dances e era musica tradicionaus entà potenciar atau eth coneishement dera cultura d’Aran.
